Maandenplant

De Gattung Primula (orrer ok Sloetelblaum, Karkensloetel, Witbücks) ut de Familie vun de Primelgewächse (Primulaceae) ümfött rund 500 Oorten, de in ierster Linie in de Nuurdhemisphäre tau Hus sünd. Dat Zentrum vun ehr Utbreidung liggt in de alpinen Wischen vun den Himalaya. De Primeln billen utduernde Stauden, de meistendeils ´ne grundstännige Blattrosett besitten. Väle Primeln bläuden in`t Frühjohr. Sei sünd wägen ehrer schicken Bläuten (ü. a. in gäl, blaag, witt un rod) as Gordenplanten wiet verbreit`t. Utergewöhnlich grot is de Tahl vun Gordentüchtungen un Hybriden. 

Tau de heimische Verträders vun de Gattung Primula tellen de Wischen-Sloetelblaum (P. veris) un de Stängellose Sloetelblaum (P. vulgaris). Beide Oorten bläuden in`n Lenz un sünd in Europa wiet verbreit`t. Sei können in lichtet Holt un up Wischen oft eis vörkamen. De Wischen-Sloetelblaum besitt `ne grundstännige Blattrosett ut dei `n Bläutenstandschaft ahn Bläder rutwasst. An sien Spitz stahn bet tau 20 gäle Bläuten. Bi de Stängellose Sloetelblaum sünd de meist blassgälen Bläuten blot `n bäten höger as de Blattrosett. Grad ut de letzte Oort sünd tahlrieke Gordenformen tücht`t worden. Wenn de Primel verbläuht is, wassen ut de afbläuhten Oorten Kapselfrüchte, de tahlrieke lütte swatt-brune Samen in sick hemmen

In`n Botanischen Gorden wassen verschiedene Primeloorten, besönners twischen dat Pankow- Rondell, Alpinum un Japangorden bet tau`n Auenwald.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.