Maandenplant

Tau de an`n meisten vörkamende Orchideenoort in`n Nuurdosten Dütschlands gehürt dat Breitblädrige Knabenkrut, de Kuckucksblaum. Up feuchte un natte Wischen is disse Oort in Middeleuropa un in Deile von Asien oft eis antaudrapen. De Bläutenstänn` von disse utduernde, krutige Oort kamen in de Maande Wonnemaand bet Gewiddermaand rut. Meistendeils warden sei bet tau 30 – 40 cm grot, mal eis ok 60 cm. Upfällig sünd de wesselstännig anurtneten Lowwbläder, de düsterfleckt sünd.

De dichtbläutige bet tau 20 cm lange Bläutenstand süht as`n Zillinner ut un hett woll so an 50 Bläuten. Taumeist sünd de Bläuten purpurrod (sprangwies hell vigelett ... vigelett-blag bet witt) un sei warden woll so oewer 1 cm lang. Up de dreilappige Lipp` (den`n sog. Labellum) sitt ein ut Punkte un Striche tausamensett`tet Muster. De Lipp´ verlängert sick in`n Sporn in den`n kein Nektar is. Na dat Bestäuben enwickeln sick ut de Bläuten Kapselfrüchte, de tahlrieke winzige Samenkürn in sick drägen. De wedder möten ierst up `nen besönnern Pilz drapen, üm ok würklich keimen tau können. As Oewerduerungsorgan hett disse Oort `ne as `ne Hand formte Knoll.

In`n Botanischen Gorden find`t sick `n groter Bestand von de Breitblädrige Kuckucksblaum up de Feuchtwischen un längs von de Waderränner.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.