Maandenplant

Tau de Gattung Viola gehüren 400 Oorten, de vör all`ns in gemäßigte Klimarebeite tau Hus sünd. Bi de Viölken hannelt sick dat meist üm utduernde, krutorrige Planten. Meistendeils besitten sei undeilte Lowwbläder, de oft in `ner grundstännigen Rosett wassen. De zwittrigen Bläuten sünd mit blot ein Symmetrieebene utstatt`t un besitten fief binah friee Kelchbläder un ok noch fief äbenso ünnereinanner nich verwussene Kronbläder. Dat ünnelste Kronbladd is an`n gröttsten un drägt den Sporn.

Dat Australsche Viölken kümmt vör all`ns in`n bäten feuchten Osten un Südosten von`n australschen Kontinent vör. De Oort besitt lütte, halwkreisförmige Lowwbläder un drägt witte, in`ne Mird blaag-vigelette Bläuten. Mit de Hülp von lange Utlöpers vermihrt sick V. hederacea fixing. As ümmergräune Zierplant kann dat Viölken in`t Hus dat ganze Johr uptreckt warden. In de Loki-Schmidt-Gewächshüser bläuht de Oort dat ganze Johr. Günstig is dorbi ein schattiger Urt. Dat Substrat (de künstliche Bodden) süllte ümmer feucht hollen warden.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.