Maandenplant

In uns Gordens sünd de Parlhyazinthen as Lenzboten oft verträden. Männigmal hannelt sick dat dorbi üm Hybriden un Sorten, de wägen ehr oftmals blagen orrer vigeletten Bläuten tücht`t warden. Von de Gattung Muscari sünd 40 tau 60 Oorten bekannt, de vör allem in`t Middelmeerrebeit, den`n Vödderen Orient un in de angrenzenen Länner verbreit`t sünd. Dat hannelt sick üm utduernde Planten, de mit`n ünnerierdisch Oewerduerungsorgan („Zipoll“) schlechte Tieden oewerduern.

De poor grundstännigen Lowwbläder sünd `n bäten fleischig. Bi de meisten Oorten hannelt sick dat üm Frühjohrsbläuher. De Bläuten sünd in endstännige Druben anurdnet. De Bläutenstänn` können bet tau 25 cm hoch warden. Typisch sünd de dalhängenden orrer nickenden Bläuten, de oft sihr schön rüken. De kugelige – `n bäten as`n Kraug utseihende Bläutenhüll wiest an`n Rand deilwies `nen witten Quadder mit lütt witt Tähnen up. Bi all Oorten hannelt sick dat üm anspruchslose Bläumings, de in`n Steingorden orrer sogor up de Finsterbänk wassen. Tau de an`n meisten uptreckte Oorten tellen M. botryoides un M. comosum. Von beid` Oorten warden meist Tüchtungen plant, de gröttere Bläuten besitten.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.