Maandenplant

Austmaand 2012: De Spritzgurk (Ecballium elaterium)


De Spritzgurk is in’n Mittelmeerrum tohus un hürt to de Körbsgewächse (Cucurbitaceae). De Oort hett Utdur un kümmt ofteis an Wechrand orrer up Geröll vör. De Plant licht meist as Krut dal un hett „ungeteilte bis handförmig gelappte Laubblätter“. De gräunlich-gäle Bläuten sünd eingeschlechtlich un kåmen in’n Heumaand un Austmaand vör.

To de Åft seggt man ok Panzerbeer, de so grot is as een Duf-Ei. Se is so as de ganze Plant stark giftig un dorüm nich to’n Äten! Is de Spritzgurk riep, is se gäl un hett bannig väl Wader binnen. Wenn se denn anfåt ward, scheit de Saftinhalt mit de Såmen bät to 12 m wiet, wenn sik de Åftstäl rut löst.

In Mitteleuropa ward de Oort wägen de interessanten Åften as einjöhrige Zierplant anbuucht. In’n Botanischen Gorden steiht de Ecballium elaterium in de Systematische un in de Morphologische Abteilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.