Maandenplant

Ein von uns bekannteste Frühjohrsbläuher is dat Scharbuckskrut (Ficaria verna). De tau de Hahnenfautgewächse (Ranunculaceae) tellende Oort fängt all in`n Februor (Hornung) an tau bläuhen, bet in`n April (Ostermaand) hen. Disse utduernde Oort kann teppichorrige grote Bestänn` billen un ward oewer blot so an 10 cm hoch.

Wieldat de jungen, as `n lütt Hart utseihenden Lowwbläder väl Vitamin C hemmen, würden sei früher bi Mangelvörkamen (Skorbut) äten. Ansünsten sünd de Planten giftig! Ehre lüchtend gälen, stiernförmigen Bläuten können einen Dörchmesser von ca. 4 cm erreiken. Sei wiesen `ne ünnerscheidliche Tahl (8–11) von kronbladdorrigen Nektarblädern up. Na de Bläutiet treckt sick dat Scharbuckskrut wedder in. De Lowwbläder verfarwen sick gäl un verwelken.

Meistendeils vermihrt sick F. verna nich oewer Samen, sünnern bill`t lütte Brutknollen ut, de up de Ierd fallen un ut ehr wassen niege Planten rut. An`n leiwsten wasst disse Oort an feuchte un schattige Stellen. In Nuurd- un Middeleuropa is sei sihr oft antaudrapen. In uns Gordens warden verschiedene Sorten von Scharbuckskrut anplant.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.