Maandenplant

De tau de Rauhblattgewächse (Boraginaceae) tellende Gattung Phacelia is ünner verschiedene dütsche Namen as Immenweid` un Büschelschön bekannt un mit dat heimische Vergett mi nich orrer ok Herrgottsogen (Myosotis sp.) un Beinwell, Swienkrut orrer Comfrey (Symphytum sp.) verwandt. All ca. 100 Phacelia-Oorten stammen ut de Niege Welt, vör allem ut den Westen vun Nuurdamerika un Chile. `N poor vun de krutigen, ein- bet mihrjöhrige Oorten sünd bi uns as Sommerblaumen siet lange Tieden etabliert.

An`n bekanntesten is P. tanacetifolia, de wägen ehr nektarrieken Bläuten von de Imkers schätzt un in Middeleuropa so af un an as so benömte Immenweid` anbugt ward. Sei ward ok as Gräundünger kultiviert. De einjöhrige Oort besitt bet oewer 70 cm hoge Stängel, de sittende, wechselstännige Bläder drägen. De Bläder sünd fedderig-lappt orrer schlitzt un dichting behoort. In`n Juni bet tau`n August kamen de fieftellenden, lila-blagen Bläuten in Schiendolden rut. Blot af un an find`t man de Oort verwildert as Neophyt, wiel dat sei in Middeleuropa nich naug winterhart is. In`n Botanischen Gorden steiht sei an`n Hauptweg böbelst vun den Diek un ìn`t Rondell.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.