Maandenplant

De Gattung Campsis (Bignoniaceae) umfött 2 Oorten. Ut China stammt de Chinesische Kladdertrumpet (C. grandiflora), ünnerdes C. radicans in`n Osten un in de Mird von`ne USA vörkümmt. Bi beiden hannelt sick dat üm sommergräune Lianen, de mit Hülp von ehr Haftwöddeln sick an anner Planten, Tuns un so wierer fasthollen. Sei können bet tau 10 m hoch warden. De gägenstännig anurdneten Lowwbläder sünd unpoorwies gefiedert. So af Juli (Gewiddermaand) kamen de schicken Bläuten rut, de tau 4–12 Bläuten in endstännigen Büscheln stahn. 

De schwach monosymmetrischen Bläuten von de Amerikanschen Kladdertrumpet besitten `ne trichterorrige Kton un sünd sihr sik an Nektar, oewer ahn `nen Duft. De Kronbläder sünd mihrstens orange bet rod orrer af un an ok gäl farwt. In`n Harwst riepen bet tau 20 cm lange Kapselfrüchte ran. 

Wägen ehr schicken Bläuten ward de Amerikansche Kladdertrumpet, oewer ok de Hybrid mit de Chinesischen Kladdertrumpet (C. x tagliabuana) välmals tau de Fassadenbegräunung insett. Bevörtogt warden warme, sünnige un bodenfeuchte Standurte. 

In`n Botanischen Gorden stahn mihrere Planten an de Kalksteinmuer an de Loki-Schmidt-Gewächshüser.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.