Maandenplant

Mit ca. 28 000 Orten billen de Orchideen de gröttste Familie (Orchidaceae) von de Bedecktsamigen Planten. De mihrsten Orchideen kamen in de tropischen Rägenwälder as Upsitterplanten (Epiphyten) vör. Sei läben up de Äst un Twieg in de Kronen von de Böm. Väle, väle Orchideenoorten teiken sick dörch prachtvulle Bläuten ut. `Ne grote Tahl von Oorten mit schönen Bläuten is tau `ne wiet verbreit`te Schmuckplant worden. Sei warden in uns Stuben hollen.

Tau de beleiwsten tropischen Orchideen, de as Stuben- un Gordenplanten hollen warden, tellen verschiedene Oorten von de Gattung  Phalaenopsis un vör allem ehre niegen Krüzungen in`n Gordenhannel. Dat gifft ca. 60 Oorten von de Gattung Phalaenopsis, de meistendeils in Südostasien (taumeist Philippinen) vörkamen. Oft eis besitten sei dickfleischige Lowwbläder un upfällige Luftwöddel, de baben oewer de gräunliche Spitz so sülwrig-gries utseihn. De deilwies groten (oewer 10 cm Dörchmesser) Bläuten sünd meistendeils witt, rosa orrer rötlich–vigelett. Upfallen deit ehre lange Bläuhtiet (Wochen bet Maande). Bi `ner gaut Pläg können de Planten oewer lange Johre hollen warden.

In`n Botanischen Gorden gifft dat Wildoorten un tücht`te Sorten in`t Tropengewächshus.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.