Maandenplant

De Gattung Pentas gehürt tau de Röte- orrer Krappgewächse (Rubiaceae) un ümfött so üm 35 Oorten, de in Afrika, Madagaskar un in`n Süden von de arabischen Halwinsel tau Hus sünd. Dat hannelt sick üm Krüter un Strüker, de so af un an as Zierplanten anbugt warden. Weltwiet an`n mihrsten ward Pentas lanceolata uptreckt. Disse Oort kümmt ut Ostafrika un Arabien un is in anneren Rebeiten von de Tropen sogor verwildert.

Bi de ok as "Fiefbläut" orrer "Fieftahlstruk" bekannten Oort hannelt sick dat üm einen Halwstruk, de bet tau 1 m hoch warden kann un de gegenstännig anurtnete, eiförmige bet längliche-elliptische Bläder drägt. De trichterförmigen Bläder stahn in ennstännigen, doldenorrigen Büscheln un kamen in`n Harwst un Winter rut. Einzelbläuten besitten `nen Dörchmesser von ca. 1 cm un wiesen `ne Kronröhr` up, de bet tau 3 cm lang is. In ehr Farw is P. lanceolata sihr wannelbor. Dat finnen sick all Twischentön` von rein witt oewer fleischfarben un rosa bet tau`n deipen Karminrosa. Bi uns kann de Oort ganz einfach as Stubenplant in`n Pott an`n warmen, halwschattigen Platz hollen warden. Man kann de Fiefbläut ganz einfach ut Samen orrer ok mit Hülp von krutigen Stecklingen in`t Frühjohr vermehren.

In`n Botanischen Gorden wasst Pentas in de Loki-Schmidt-Gewächshüser.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.