Maandenplant
Sneimaand 2012: Dat Louisianamoos (Tillandsia usneoides)
Dat Louisianamoos orrer Spanisch Moos is en Bromelienplant (Bromeliaceae) ahn Wöttel, de in Gebieten mit sihr natter Luft as Upsittplant (Aufsitzerpflanze – Epiphyt) von Böm, Telegrafenmasten u. ä. runner bammelt. Väle verschiedene Formen un Orten kamen ut’n Südosten von de USA öwer Middelamerika bet nah Chile un Argentinien vör. Mit siene langen, drahtorig dreihten, greunliche Driebe erinnert dat Louisianamoos an de Bartflechte (Usnea) in unsen Holt un ernährt sick so wi de blots von’n Stoff ut de Luft.
De Sprosse un Bläder hemm dichte griese Saugschuppen, öwer de Wader upnahmen ward’ un de bi dröger Luft vör Sünn un Utdünstung schützen. Blots af un to kamen de lütten greunlich-gälen Blüten. In de Loki-Schmidt-Gewächshüser is de Ort mit lang rünner bammelnde Exemplare up de Epiphytenstämm’ to seih’n. As Stubenplant künn man de Tillandsia usneoides ok holln. De Ort brukt öwer ‘ne helle Stell, an de se rägelmäßig mit kalkarmet Wader afsprüht warden möt.
Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.
