Maandenplant

De Griese Skabios` (ok Rükels Skabios` orrer Griesen Papenklöten benömt) is `ne utduernde, krutige Oort, de in gemäßigte, kontinentale Rebeite von Süd- un Ostdütschland blot noch sprangwies in`t dröge-warme Kiefernholt un up halwdrögen Rasen tau finnen is. Tau de Gattung Scabiosa tellen ungefiehr 80 Oorten, de ü. a. in`t Middelmeerrebeit up steinig, apene Wuchsurte upträden. In ollen Tieden würden de Skabiosen tau de Kardengewächse (Dipsacaceae) tellt, hüt oewer tau de Geißblattgewächse (Caprifoliaceae).

In de Sommermaande billd`t de Griese Skabios` einen bet 50 cm hogen Bläutenstand ut, de `nen Dörchmesser von 2 bet 3 cm upwiest. De Bläutenstand is rundlich – as`n Kopp formt – un besteiht ut väle blaag-vigelette Einzelbläuten. Von ehr geiht ein sihr schöner-fiener Duft ut. Disser lockt dorüm väle Bläutenbesäuker an. De ünneren Lowwbläder sünd ungedeilt, indes de Stängelbläder fiederschnittig sünd. Oewerhaupt eignen sick de Skabiosen as Wildblaumen för dröge un sünnige Stellen sihr gaut. Dorbi leiwen de S. canescens kalkhollige Ierd besonners. De Vermihrung passiert dörch Utsaat orrer dörch Deilung von de Planten.

In Mäkelborg-Vörpommern gifft dat siet väle Johre ümmer weniger Scabiosa canescens un dorüm steiht sei up de Rode List. De Botanische Gorden Rostock führt sei in spezielle Erhollungskultur, ü. a. genau an`t Pankow-Rondell.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.