Maandenplant

De Gattung Epilobium (Onagraceae, Nachtlichtgewächse) kümmt mit oewer 150 Oorten in Nuurdamerika, Europa un Asien vör. Up de ganze Nuurdhalwkugel wasst dat Schmalblädrige Wiedenröschen an apen Urten. Dat hannelt sick üm `ne Staud`, de bet tau 150 cm hoch warden kann. Besünners up Waldinschläg billen sick massenhaft väle niege Bestänn`. Dat is ganz licht, wiel de Oort sick oewer de Wöddelutlöper vermihrt.

De uprechten, sprangwies vertwiegten Stängels sünd ofteis `n bäten rod infarwt. Sei drägen wesselstännig anurdnete, lanzettliche Bläder, de up de Ünnersiet blaaggräun sünd. Von Juni (Rosenmaand, Braakmaand) bet August (Austmaand) kamen de in ein Druw anurdneten Bläuten rut. De groten (2-3 cm in`n Dörchmesser) purpurroden Bläuten besitten eiförmige Kronbläder. Ut ehr gahn schmale Kapselfrüchte hervör. In ehr befinnen sick väle mit `nen Hoorschopp bewassene Samenkürner. De gärtnersche Vermihrung geiht oewer de Wöddel-utlöper orrer dörch Utsaat..                                                                                                          

De Oort wasst an`n leiwsten up dröge, sannige Humusierd direkt in`ne Sünn`. In`n Botanischen Gorden wasst dat Schmalblädrige Wiedenröschen in de Morphologischen Afdeilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.