Maandenplant

Dat tau de Hahnenfautgewächse  (Ranunculaceae) tellende Blagööschen is`n smucker Frühjohrsbläuder. In`n Lenzmaand un Ostermaand kamen ut de niedrigen (10 tau 15 cm hogen) utduernden Planten ehre himmelblagen Bläuten rut. De Tahl von de hellblag farwten Bläutenhüllbläder wesselt. Mihrstendeils sünd dat oewer söß bet söben. Tau ehr gehüren de dreilappigen Lowwbläder, de in ehr Form an`ne minschliche Läwer erinnern. Dorüm glöwte man in`t Middelöller, dat dat Blagööschen – de Läwerblaum – gägen Läwerweihdag innahmen warden kann. An `ne Unnersiet sünd de Lowwbläder vigelett oewerlopen.

An`n natürlichen Standurt is dat Läwerbläuming (Hepatica nobilis,Syn. Anemone hepatica) ok mit witt-, rosa- un rodbläudende Formen antaudrapen. An`n leiwsten wasst de Oort an schattige Stellen unner de Bäuken un Eiken. Dorbi warden kalkhollige Boddens bevörtogt. De Oort besitt ein wiedes Verbreidungsrebeit, dat slött Europa, Ostasien un dat östliche Nuurdamerika in.
In`n Botanischen Gorden find`t man dat Blagööschen in`t Rebeit von de Bäuken. In de Tüchtung giwt dat väle Formen, sogor ü. a. mit füllte Bläuten.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.