Maandenplant

De Gattung Calocedrus gehürt tau de Machandelböm orrer Wacholler nömt un ümfött vier Oorten. Bi de bekannteste Oort hannelt sick dat üm de einzige in Amerika beheimatete. Dat is de Kalifornsche Flusszeder (ok Weihrok- orrer Bliestiftzeder benömt). Ehr Vörkamen treckt sick dörch dei Barge in`n bannig westlichen Deil von Nuurdamerika von Oregon oewer Kalifornien bet in`t nuurdliche Mexiko. Dor wasst sei an`n besten an`n Fluss entlang un ok in deipe Schluchtenwälder. Ehr makt ok `ne längere Drögnis nix ut.

De Flusszeder erinnert uns an unsen Läbensbom. Sei kann bet tau 60 m hoch un bet tau 3 m dick warden. Typisch för dissen ümmergräunen Bom sünd sien smallet un pyramidenorriget Utseihn. Hei hett `ne stark afblädernde Bork. Sei is upfallend orangefarwig. Dei Bläder glänzen gräun, sünd schuppenorrig un liggen fast an. Dorbi stahn sei sick krüzwies gägenoewer. Wenn man sei mörmakt, rüken sei aromatisch un `n bäten säut. In de 2–3 cm langen un sössschuppigen Zappen wassen Samen mit lütte Flüchten.

In Middeleuropa is de Kalifornsche Flusszeder meistendeils winterhart un süht schick as Parkbom ut. De Hauptverwennung von dat Holt, dat ok sihr gaut rückt un ok noch nich so licht fuult (ahn Harzgänge), liggt bi de Produktion von Bliesticken. De Antucht erfolgt dörch de Utsaat von Samen in`n Harwst. In`n Botanischen Gorden wasst de Kalifornsche Flusszeder gradtau an`n Pankow- Rondell un in Sichtwiet baben bi de Koniferensammlung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.