Maandenplant

Harwstmaand 2015: De Blasenesch (Koelreuteria paniculata)


De tau de Seipenbomgewächse (Sapindaceae) (dortau gehüren ok Ahuurn un Rosskastanie) tellende Blasenesch is in China un Korea tau Hus. Benömt is de 3 bet 5 Oorten ümfatende Gattung na den`n dütschen Botaniker Joseph Gottlieb Kölreuter (1733–1806), de in Karlsruhe tau Hus wier. As Smuckholt wier disse Oort bi uns in olle Tieden in Parks un Gordens as Einzelplant verbreit`t un is intwischen `nbäten ut de Mod` kamen.

De sommergräune Bom kann `ne Höh` vun bet tau 15 m kriegen un besitt ca. 40 cm lange Fiederbläder. De Bork vun den Stamm is upfällig furcht. In`n Sommer kamen gäle, ca. 1 cm breide Bläuten rut, de in lange uprechte Rispen stahn. Bi de sick ut de Bläuten enwickelnde Früchte vun de Blasenesch (orrer Blasenbom) hannelt sick dat üm papierorrig upgeblasene Kapselfrüchte. In ehr finnen sick meist drei rundliche, swatte Samen. De können in`t Frühjohr gliek na buten utseid`t warden un süllten in`n Harwst un Winter in`t 1. Johr vör Frost schützt warden. För Spezialisten beit`t sick ok `ne Vermehrung dörch Aflegger un Wöddelschnittlinge an.

In`n Botanischen Gorden steiht ein Blasenbom näben den`n Hauptweg bi`n ünneren Diek.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.