Maandenplant

De Gattung Picea (Kienbomgewächse, Pinaceae) kümmt mit 30 bet 40 Oorten in de kolt gemäßigten Rebeite von de Nuurdhalwkugel vör. De Gemeine Ficht (Picea abies) wasst in Nuurd- un Middeleuropa vör allens in högere bargige Lagen un bill`t Wälder. De ümmergräune Bom kann bet tau 30 bet 50 m hoch warden un besitt `ne spitz-pyramidenorrige Kron mit waagrechte orrer `n bäten runnerbögte Telgen. De junge Bombork is gladd un hellbrun. De öllere is rötlich-gries. De Nadeln sünd 1 bet 3 cm lang un vierkantig. De lang-zylinderorrigen Tappen bammeln na unnen un sünd so 10 bet 16 cm lang.

De Fichten sünd bedüdende Holtlieferanten un warden all väle Johre in `ne Forst nutzt. Dat gifft tahlrieke Afweichungen von de normalen Wuchsformen un von de Nadelfarw. Ein Bispill gifft uns de Adder-Ficht, de so an un af as Schmuckbom plant ward. Bi disse Form wassen blot poor Siedentelgen un dorbi stahn de böbelsten Twieg na baben, de ünneren richten sick na unnen as `ne Pietsch. Tausamenseihn is de Kron man sihr licht.

In`n Botanischen Gorden dröppt man `ne grote Adder-Ficht up den`n Weg von`t Alpinum tau de Morphologischen Afdeilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.