Maandenplant

As Unnerwuchs vun de warmen europäischen Lowwälder kieken vun`n Lenzing bet April de Bläuten vun den Hollen Lerchensporn rut. Dortau brukt hei oewer feuchten un basischen Waldbodden, üm dichte Bestänn` billen tau können. Dei in de Familie vun de Mohngewächse (Papaveraceae) tau de Unnerfamilie vun de Erdrauchgewächse (Fumarioideae) tellende Oort besitt in`n Gägensatz tau`n verwand`ten Mohn keinen Melksaft. De Einzelbläuten sünd 2–3 cm lang, purpurfarwt bet vigelett un witt. In de gespornten Bläder täuwt de Nektar up de Bestäuber. De wesselstännig anurdneten Lowbläder vun disse utduernde Oort sünd gefiedert un ehre Babensiet blaaggräun.

Sienen Namen hett hei vun de Sproßknoll, de 3–4 cm Dörchmesser erreiken kann un  ein Hollrum inschlött, in den`n de Dochterknollen ranwassen. De Knoll deint as Oewerläbensorgan, mit dat de Holle Lerchensporn na dat Intrecken vun de Lowbläder in`n April bet tau dat nächste Frühjohr oewerduert. De Holle Lerchensporn is `ne Giftplant! De Gattung Corydalis umfött rund 300 Oorten un is vör allem up de Nuurdhalwkugel verbreit`t. Verschiedene Oorten warden as Zierplanten tücht`t. `N ganz neechsten Verwandten is dat ut China stammende "Tränende Herz" (Dicentra spectabilis), dat in uns Gordens wiet verbreit`t is.

In`n Botanischen Gorden wasst Corydalis cava in`n groten Flach intbesonnere rechts vun`n Weg tau dat Schilfdackhus ünner de Götterböm un Ölwieden.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.