Maandenplant

De Gattung vun de Geweihfarne (Platycerium sp., Polypodiaceae) ümfött`t 18 Oorten, de vör allem in de Tropen vun de Olle Welt vörkamen. Dat hannelt sick üm sihr stattliche, meistendeils epiphytische (up anner Böm wassende), sprangwies up Felsen wassende Oorten. Sei besitten all` twei verschiedene Bläder (Heterophyllie): a) normale gräune Bläder mit `n upgliederten Stäl, uprecht orrer dalhängend, typischerwies mihrfach gabelt, bet tau 1 m lang, un b) brune, sogenannte Nischen- orrer Schuppenbläder, de as`n Dackstein oewereinanner lagert sünd un up de Unnerlag anliggen. De Nischenbläder sammeln den Humus un sorgen so för de Planten, dat sei tausetzlich noch Wader un Nährstoffe kriegen. Dat können de Planten dörch ein dichtet Wöddelgeflecht upnähmen. De brunen Sporangien (Sporenbehälter) finnen sick up de Unnersiet vun de normalen Bläder.

Verschiedene Geweihfarn-Oorten (u. a. P. alcicorne, P. grande, P. wandae) sünd as Zierplanten beleiwt, de sick an einen hellen, oewer nich tau sünnigen Urt ok in de Stuw` lang uptrecken lett. Wichtig is `ne hoge Luftfeuchtigkeit. Na ehren epiphytischen Charakter na, warden de Geweihfarne meistendeils up Kork orrer in Körw` in `ner Epiphytenmischung hollen. Mihrere Oorten sünd in de Loki-Schmidt-Gewächshüser vun den `n Botanischen Gorden tau seihn.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.