Maandenplant

De Gattung Catalpa (Trompetenbomgewächse, Bignoniaceae) umfött ca. 10 Oorten, de in`n Südosten von Nuurdamerika un in de Karibik sowie as ok in Ostasien verbreit`t sünd. Dat hannelt sick üm sommergräune orrer halw-ümmergräune Lowwböm.

De Gemeine Trompetenbom is in Nuurdamerika von Georgia bet Missouri tau finnen. Grote Böm können in `ne Höcht von bet tau 15 m scheiten. De meistendeils gägenstännig anurdneten Lowwbläder schlagen ierst in`t late Frühjohr ut. Sei sünd bet 20 cm lang un seih`n so as`n Hart, `n bäten eiförmig ut. Von`n Juni (Heumaand) bet Juli (Gewiddermaand) kamen de, an`n Enn` stahen-den Rispen orrer Druben rut. Disse sünd zwittrig un wiesen `n glockiget, tweilippiget Kronruhr up. De Babenlipp is tweilappig un de Unnerlipp dreilappig. De Farw` von de Kronbläder is witt. Dorbi sünd in`n Schlund gäle Striepen un purpurrode Plackens tau seih`n. Bi de Früchte hannelt sick dat üm ca. 30 cm lange, schmale Kapseln, de sick mit twei Klappen updaun. In ehr liggen väle geflügelte Samen.

Trompetenböm sünd sihr schick un sei  benödigen einen frie`n Standurt mit väl Sünn. In`n Botanischen Gorden wür in de 70er Johre ein Bom plant. Dei is ünnerdes all ungefiehr 15 m hoch. Man dröppt em bi de Magnolien nah bi dat Pankow Rondell.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.