Maandenplant

De Gattung Geranium (Geraniaceae) umfött mihr as 300 Oorten, de besönners in de Nuurd-Ierdhälft verbreit`t sünd. `N poor Adeborsnabel-Oorten sünd ok in Middeleuropa antaudrapen. De dütsche Nam` „Adeborsnabel“ betreckt sick up de langstreckten Samen, de an einen Snabel denken laten. Bi de mihrsten Oorten hannelt sick dat üm utduernde Stauden. Wägen ehr schönen Bläuten deinen väle Geranium-Oorten as Schmuckplanten.

De Blautrode Adeborsnabel is in Europa wiet verbreit`t un wasst vör allem up dröge, kalkhollige Ierd. Dat hannelt sick üm `ne Staud` mit utbreit`t , polsterorriget Wassen. Sei kann meistendeils `ne Höcht von 20 bet 30 cm kriegen. De gägenstännigen Lowwbläder sünd fiefdeilig un können `n bäten behoort sien. Wie dat Wäder is, so kann de Bläuhtiet von Mai bet September duern. De Bläuten hemmen ´nen Dörchmesser von 2 bet 4 cm un drägen fief rötlich-vigelette Kronbläder. De Früchte kriegen `ne Läng` von 4 bet 5 cm.

In uns Gordens warden väle Varianten von den Blautroden Adeborsnabel anplant. In`n Botanischen Gorden wasst hei in`t Alpinum in`t Rebeit Kaukasus-Kalk gliek an`n Hauptweg dörch dat Alpinum.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.