Maandenplant

Christmaand 2017: De Kolorado-Dann (Abies concolor)


Nadelböm sünd in de Barge in`n Westen Nuurdamerikas in groter Välfalt tau finnen. Dortau tellen ok de verschiedenen Dannen, de tau de Kieferngewächse (Pinaceae) tellen. De Gattung Abies is mit so bi 40 Oorten in de gemäßigte Zon von de Nuurdhalwkugel verträden. All Dannen sünd ümmergräun un besitten Nadelbläder. Dat Verbreidungsrebeit von de Kolorado-Dann treckt sick von`n Westen von de USA von de Rocky Mountains bet tau de Sierra Nevada dicht an bi de Pazifikküst. De fix wassende Oort erreikt `ne Höcht von bet tau 50 m un `nen Dörchmesser von mihr as 1 m. Wiel dat Holt `ne schlechte Qualität hett (tau weik is), ward de Oort kum nutzt.

De hellgriese Bork is bi de jungen Böm glatt un blädert bi de ollen Böm in unrägelmäßigen Placken - Schuppen af. Ehre blag-gräunen Nadeln können bet tau 7 cm lang warden. Bi`t Rieben Bröseln rüken sei so as Zitron` (Goldappels orrer Königappels). Wenn sei so üm 30 Johr olt sünd, wassen endlich ok Bläutenzappen. Männliche sünd rosafarwt un bet 2 cm lang. De weiblichen sünd gälgräun bet rod farwt. Ut ehr billen sick uprechte, samendrägende Zappen, de mihr as 10 cm lang warden können. De Kolorado-Dann brukt nich väl un is in uns Breiten afsolut winterfast. Sei ward oft eis as Zierholt nutzt. In`n Botanischen Gorden wasst disse Oort in`t Arboretum.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.