Maandenplant

Sneimaand 2020: De Zulutüffel (Bowiea volubilis)


Ut de Dröchrebeite von Ost- un Südafrika kümmt de Zulutüffel orrer Kladderzipoll (Bowiea volubilis, Asparagaceae) her. De mit den`n Spargel (Aspars) verwandte Oort besitt grote (mihr as 15 cm Dörchmesser) Zipollen, de gräun farwt un nich in de Ierd insteckt sünd. In uns Rebeite kann de Oort in`n groten Pott orrer `ne Schal up sünnig-warme un helle Finsterbänk hollen warden.

Ut de Zipollen drieben so af den`n Sneimaand (Januor) kahle Stengels ut, de mihrere Meters hoch kladdern können un an ehr sitten gräunlich-witte Bläuten. In de Sommermaande welken de hochkladderten Sprossen af un de Planten oewerduern mit de waderspikernten Zipollen. Dorna können de Planten an`n hellen un nich tau warmen Urt hollen warden. De Zulutüffel is stark giftig (dat Äten von Sprossen orrer Zipollen führt fix tau`n Hartdot) un ok dat Anfaten von de Planten kann de Hut angriepen.

In`n Botanischen Gorden ward de Oort in`t Sukkulentenhus hollen.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.