Maandenplant

De tau de Nachtkerzengewächse (Onagraceae) gehürende Gattung Fuchsia umfött ca. 100 Oorten. Binah all Verträder von disse Gattung kamen ut Middel- un Südamerika, wo sei vör allem in dat Bargrägenholt wassen. Ein poor Oorten gifft dat in Neuseeland. Bi de meisten Oorten hannelt sick dat üm Halwstrüker un Strüker. Oewer de ganze Welt verdeilt, warden tahlrieke Fuchsienoorten bzw. -Sorten wägen ehrer hübschen Bläuten uptreckt.

Bi de meisten Oorten bammeln de Bläuten na unnen un sünd ganz upfällig farwt. Mihrstendeils hemmen sei `n verlängertet Bläutenruhr un an de Spitz dorvon wasst ein Quadder ut Kelchbläder. In`ne Rägel sünd 4 Kronbläder dor. Bi väle Oorten sünd de Bläuten rod orrer vigelett farwt. Ut ehr wassen oft vigelette Beeren, de man ok äten kann. De meisten Fuchsien (Bammellocken) sünd in Middeleuropa nich winterhart. Dorüm plant man sei ok in Pött. Winterharte Verträder (u. a. F. magellanica) künn man an halwschattige Standurte uptrecken.

In`n Botanischen Gorden sünd Klockenböm orrer Bammellocken dicht bi de Herrmann von Guttenberg-Büste tau seihn.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.