Maandenplant

De Kap-Bliewurz tellt tau de Gattung Plumbago (Plumbaginaceae), de mihr as 20 Oorten umumfött. Bi Plumbago auriculata hannelt sick dat üm einen ümmergräunen Halwstruk, de in Südafrika (ü. a. KwaZulu-Natal) tau Hus is un `ne Höcht von 2 bet 3 m kriegt. De Telgen sünd uprecht un af un tau kladdernd. So an 5 cm lang sünd de kort stäligen Lowwbläder. An ehr Ünnersiet sünd sei von witten Schüppchen taudeckt. Von`t Frühjohr bet in`n Harwst kamen de Bläuten rut. Disse sünd hellblaag bet witt un stahn in ennstännigen Druben. De ungefihr 1 cm langen Kelchbläder sünd dicht mit kläwriget Drüsenhoor besett. An disset blifft lütt Getier backen, dat oewer nich verdaugt ward. De Bläutenkron hett ein 3 bet 4 cm langet Ruhr.

Von de Kap-Bliewurz gifft dat väle Sorten, de sick in de Bläutenfarw ünnerscheiden. In de Tropen un Subtropen tellt de Oort tau de beleiwtesten Schmuckplanten. In uns Breiten is sei nich winterhart un sei ward oft as Tubbenplant uptreckt. In`n Botanischen Gorden steiht sei twischen de annern Tubbenplanten näben de Loki-Schmidt-Gewächshüser.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.