Maandenplant

As polsterbillende Gordenplanten sünd de verschiedenen Aubrieta-Oorten bzw. ehre Krüzungen sihr beleiwt. Dei tau de Krüzbläutler (Brassicaceae) tellende Gattung umfött ca. 15 Oorten, de vör allem in de Gebirgsrebeite rings üm dat Middelmeerrebeit tau finnen sünd. Bi de an`n mihrsten kultivierte Oort hannelt sick dat üm A. deltoidea. Disse Oort is von de Balkanhalwinsel bet na Vörderasien verbreit`t. De sihr verännerliche Oort bill`t dichte, rasenorrige Plackens un besitt grau behoorte, gägenstännig anurdnete Lowwbläder. Ehre upfälligen düstervigeletten Bläuten sünd viertellig un kamen in`n Oster- un Wonnemaand rut. Ut ehr gahn langstreckte Schoten hervör. Näben disse Oort giwt dat in unse Gordens mihrstendeils Cultivare tau seih`n.

Blagküssen passen gaut in Steingordens, Drögmuern un tau Infatungen. Sei benödigen `nen sünnigen Standurt un dörchlässige, oewer nahrhaftige Ierd. De Vermihrung von Blagküssen is ganz einfach un passiert dörch Deilen orrer Stecklinge. In`n Botanischen Gorden kann man de Farwenpracht von Blagküssen in`t Rebeit von`n Alpinum bewunnern.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.