Maandenplant

Wonnemaand 2020: Dat Lütte Ümmergräun (Vinca minor)


De Gattung Vinca gehürt tau de Hundsgiftgewächse (Apocynaceae) un umfött binah 10 Oorten. Vinca minor is ursprungswies in`t Middelmeerrebeit tau Hus. De Römer bröchten de Oort as hübsche Plant na Middeleuropa, wur se ok hüt noch af un an in dat Lowwholt wild wasst. Ut alle Deile kümmt von de Plant giftiger Melksaft rut.

Bi dat Lütte Ümmergräun hannelt sick dat üm `nen deipliggenden, krupigen Halwstruk, de blot ganz selten mal höger as 20 cm hoch ward. De gägenstännige, ledderorrige Lowwbläder drägenden Schosse bewöddeln sick meistendeils an de Knuppens un können pro Johr so woll oewern Meter länger warden. De Bläuten kamen blot an de uprechten Schosse rut, wurbi se in de Blattachseln stahn. De hübschen hellblagen bet vigeletten Bläuten kriegen oft eis `nen Dörchmesser von 2–3 cm. Bläutiet is von Lenzmaand bet Heumaand. De Duppel-Balgfrüchte billen sick in`n Heumaand un Gewiddermaand.

As Boddendecker kann man dat Lütte Ümmergräun gaut för halwschattige Standurte gebruken. So as tau`n Bispill in de Morphologische Afdeilung in`n Botanischen Gorden.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.