Maandenplant

Hornung 2019: De Dreimasterblaum (Tradescantia sillamontana)


De Gattung Tradescantia umfött so woll an 70 Oorten, de blot in de Niege Welt vörkamen. Eine ganze Reihg von Oorten ward as Zierplanten uptreckt (ü. a. T. fluminensis, T. navicularis). Bi de Tradescantia sillamontana hannelt sick dat üm `ne utduernde , ümmergräune Oort, de in`n drögen Nuurdosten von Mexiko tau Hus is. De tau de Commelinaceae tellende Oort ward so an 30 cm hoch.

Siehr upfällig sünd de tweizeilig anurdneten Lowwbläder, de dicht von witte Hoor bedeckt sünd. De Lowwbläder können dat Wader sammeln un upbewohren (sukkulent) un dorüm längere Dröchnis oewerduern. In de Sommermaande kamen rosa-vigelette Bläuten rut, de einen Dörchmesser von 1,5 cm hemmen können. Sei warden von lowwbläderähnliche Hochbläder ümgäben. De Plant is nich winterhart. Oewer sei kann as smucke Stubenplant an`n lichten Urt hollen warden. In`n Pott mag disse Oort an`n leiwsten `nen luftigen Bodden un nich tau natt. In`n Botanischen Gorden find`t man T. sillamontana in`t Sukkulentenhus.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.