Maandenplant

De Wunnerbom orrer Rizinus stammt woll ursprünglich ut dat tropische Afrika. Hüt kümmt hei in väle warme Regionen verwildert vör. De tau de Wulfsmelkgewächse (Euphorbiaceae) tellende Gattung Ricinus ümfött blot ein Oort. In`n Anbu is de Oort woll all siet 6000 Johr bekannt. De hoch-kultivierten Völker ut den`n Vödderen Orient nutzten disse Plant vör allem wägen den`n ölrieken Samen. Dorut makten sei ü. a. Lampenöl. Ok spälten de Samen `ne grote Rull bi de Schönheits- un Heilmiddel.

Rizinusöl is hell un nich giftig! Oewer all annern Deile von den`n Samen sünd giftig! Besonners in dat Spiekergewäw` sitt dat hochgiftige Eiwitt Rizin. All ganz lütte Mengen von Rizin sünd för Minschen hochgiftig!

In de Tropen wasst de Wunnerbom ganz fix. Sien höltern Stamm kann 6 bet 10 m hoch warden. Bi uns tau Hus hollen wi de Oort as einjöhrige Plant. Sihr smuck sünd de groten (mihr as 50 cm Dörchmesser), hännförmig lappte Lowwbläder. Sei besitten lange, rode Bladdstäls.

De upfälligen Bläutenstänn` warden af August (Austmaand) bild`t. Disse drägen unupfällige eingeschlechtliche Bläuten. Bi de Früchte hannelt sick dat üm Spaltfrüchte. Dorin liggen de ca. 1 cm langen, lüchtenden Samen.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.