Maandenplant

In de Familie von de Nachtschattengewächse (Solanaceae) gifft dat väle brukbore Planten mit groter wirtschaftlicher Bedüdung. Dortau tellen ü. a. de Tüffel, de Paprika un de Tomat (de Paradeisappel). Dornäben finnen sick in disser Familie ok väle giftige Verträder, de tau`n Dod führen. Hierbi hannelt sick dat ü. a. üm dat Bilsenkrut un de Tollkirsch (Tollkasbeer). Ok de Gattung Nicotiana gehürt tau de giftigen Verträder bi de Nachtschattengewächse. De mihrsten von de 70 Oorten von disse Gattung stammen ut Südamerika. De bekannteste Oort von disse Gattung is N. tabacum, de Toback.

Knasch verwandt is de Buerntoback, de ut de Anden stammt. Dat hannelt sick üm `ne einjöhrige Oort, de oewer 1 m hoch warden kann. In de breit-lanzettlichen Lowwbläder is in hoger Anreikerung dat Nicotin binnen. De in de Sommermaande bläuhende Buerntoback drägt väle, väle Bläuten. De gräunlich-gälen Kronbläder sünd bet tau 2 cm lang.

Siet dat 17. Johrhunnert ward de Buerntoback in Europa as Toback anbugt. In`n Botanischen Gorden find`t man em in de Offizinellen Afdeilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.