Maandenplant

De tau de Ölbomgewächse (Oleaceae) tellende Gattung Forsythia umfött 9 Oorten. Eine Oort (F. europaea) is in Südosteuropa (Albanien) tau Hus. Oewer de annern Oorten kamen all ut Ostasien. Bi all Forsythien hannelt sick dat üm sommergräune Strüker, de `ne Höch von 2 bet 3 m erreiken können. All Oorten besitten gäle Bläuten, in de blot twei Stoffbläder vörhannen sünd. In uns Parks un Gordens so as ok in`t Arboretum von`n Botanischen Gorden ward vör allem F. x intermedia uptreckt. Sei ward för `ne Tüchtung ut F. suspensaun F. viridissima hollen. In`t Frühjohr (Lenzmaand bet Wonnemaand ) kamen de välen grellgälen Bläuten rut. Sei stahn mihrstendeils tau tweit orrer drütt.

In`n Gordenhannel gifft dat väle Sorten. Oewer de ünnerscheiden sick vör allem dörch de Grött von `ne Bläuten. Ierst, wenn sei utbläugt hemmen, kamen de länglich-lanzettlichen Lowwbläder rut. Sei sünd gägenstännig anurdnet. Forsythien stellen keine groten Ansprüch. Sei leiwen oewer `nen nich tau drögen Bodden un schönen, vullen Sünnenschien. Af un an süllten de öllsten, drögen Twieg utsnäden warden. Forsythien laten sick leicht dörch Stecklinge vermihren.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.