Maandenplant

Bi de Wulfsmelkplanten (Euphorbiaceae) bild`t de Gattung Euphorbia mit mihr as 1500 Orten den gröttsten Verwandtenkrink. Binah all Verträder sünd dörch ehren witten, giftigen Melksaft kennteikent. Ut Middel- un Südamerika stammt dat E. hypericifolia (ok ünner den Namen Chamaesyce hypericifolia bekannt). Hei is ein an tiedwiese Drögheit anpasster, flacher Struk. Weltwiet ward de Oort in de Tropen un ok Subtropen in de Gordens hollen. Af un an is de Oort ok invasiv worden. (ü. a. up Hawaii).

De dütsche Nam` „Sneidrieben“ wiest up de upfälligen Bläutenstänn` hen, de binah ganzjöhrig tau seih`n sünd. In ehr befinnen sick lütte unschienbore Bläuten, de von grötteren witten Blädern (Tragblättern) ümgäben sünd. An de gräunen Telgen sitten lütte, smale Lowwbläder.

In de Uptucht is de Struk „Sneidrieben“ ahn Ansprüch. Hei benödigt `nen sünnigen Standurt un kann in`n Pott in dörchlässiget Substrat hollen warden. In de Loki-Schmidt-Gewächshüser wasst dat „Sneidrieben“ in`t Sukkulentenhus.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.