Maandenplant

De Kieferngewächse (Pinaceae) billen de gröttste Familie bi de Nadelböm. Sei ümfaten ca. 225 Oorten un dortau gehüren Gattungen as ü. a. Abies (Dannen), Cedrus (Zedern), Larix (Lärchen), Picea (Fichten) un Pinus (Kienböm). De Gattung Picea ümfött mihr as 30 Oorten, de vör allem in de käuhl-gemäßigten Rebeite von de Nuurdhalwkugel vörkamen. In Middeleuropa kümmt ok up natürliche Wies de Gemeine Ficht` (Picea abies) vör, de ok as Forstbom von groter Bedüdung is.                                       

De Kaukasus-Ficht` (ok Morgenländsche Ficht` nömt) is in Kleinasien un in`n Kaukasus tau Hus. De pyramidenorrig wassende Ficht` ward an ehren natürlichen Standurt bet tau 60 m hoch. Sei wasst langtögsch. Uptreckt ward sei meistendeils blot so an 30 m hoch. Ehre vierkantigen Nadelbläder glänzen gräun un warden so von 5 bet 10 mm lang. De männlichen Zappen sitten an`t Enn` von lütten Telgen. De dalbammelnden Wiefzappen warden bet tau 8 cm lang. Von de Kaukasus-Ficht` gifft dat ganz väle Tüchtungen in de Parkanlagen un Gordens in dat gemäßigte Klimarebeit.

In`n Botanischen Gorden Rostock wasst sei mit noch anneren Nadelböm näben de Ümmer-gräune Afdeilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.