Maandenplant

Dei Gattung Berberis schlött oewer 600 Oorten in, de gröttstendeils in Südamerika vörkamen. Tau de wenigen europäischen Oorten gehürt de Paiselbeerstruk (ok Suerduurn orrer Dreeduurn nömt), `n bet tau 4 m hoger Struk. De gefurchten Äst` un Twieg` drägen meistendeils 3 gedeilte Blattduurnen. An de korten Driebe wassen kortstälige sommergräune Lowbläder. In`n Mai un Juni kieken gäle, in Druben stahende Bläuten rut. Ovale Beerenfrüchte, de hellrod orrer blautrod farwt sien können,schmücken den Suerduurn bet wiet in`n Harwst rin. De suer schmeckenden Beeren sünd sihr vitaminriek un können tau`n Kaken von Marmelad` nahmen warden.

In uns` Gegend is de Dreeduurn selten worden,wiel dat hei as Twischenwirt von den Getreideschwattrost binah utrott würd`. In`n Botanschen Gorden steiht hei bi de Offizinellen-Afdeilung. `Ne gröttere Sammlung an Berberitzen-Oorten treckt sick dornah von de Afdeilung von de ümmergräunen Planten oewer den groten Rasen bi`n Alpinum.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.