Maandenplant

Binah oewerall in de Tropen un Subtropen un bet in`t Middelmeerrebeit rin is de Drillingsblaum orrer ok Buganvillea as Schmuckplant sihr beleiwt. De Gattung Bougainvillea gehürt tau de Familie von de Nyctaginaceae un umfött so an 15 Oorten, de in Südamerika tau Hus sünd.

As hübsch utseihende Kladderstruk ward vör allem B. glabra ut Brasilien tücht`t. De oewerbammelnden, durnigen Telgen können `ne Höcht von 4 bet 6 m kriegen. Tücht`t warden de Drillingsblaumen in välen Tuchtformen. Ehre Bläutenstänn` wiesen upfällig farwte 3 bet 4 cm lange Hochbläder up. Ofteis sünd disse lüchtend vigelett farwt. Dat giwt oewer ok orange orrer witte Formen. Während de ganzen Sommermaande sünd de Strüker in `nen dichten Farwschleier hüllt. In disse Tiet kamen ok de eigentlichen Bläuten, de schmal-trichterorrig formt sünd rut un warden von de Hochbläder ümgäben. Sei besitten `ne gräungäle Hüll un sünd in Dreiergruppen anurdnet. De oval-lanzettlichen Lowwbläder stahn wesselstännig.

In uns Breiten kann man de Drillingsblaum blot in`n Sommer buten hollen. In`n Winter benödigt sei as Kübenplant `nen hellen Platz bi Temperaturen von 10 bet 20 °C. In`n Botanischen Gorden steiht de Bougainvillea in`n Sommer as Schmuck vör uns Hüser.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.