Maandenplant

De Teiglerblaum orrer Lörrick bläuht stellenwies all in`n Hornung un tellt dormit tau uns iersten Frühbläuhern. Siene gälen Bläutenstänn`, de bet tau 30 cm hoch warden können, kamen vör de Lowwbläder rut. Bi dissen Korfbläutler (Asteraceae) setten sick de Bläutenstänn`ut tahlrieke Tungen- un Röhrenbläuten tausamen. De Früchte von den Lörrick können dörch den Wind oewer väle Kilometers utbreit`t warden. Ok oewer de Wöddelutlöper kann sick de utduernde Oort utbreiden. De Lowwbläder besitten `nen hart- orrer hufförmigen Ümriss un warden bet tau 20 cm breit. Up ehr Ünnersiet sünd sei dicht – as mit witten Filz – behoort.

In Europa un Asien is de Oort sihr wiet verbreit`t, in Nuurdamerika gellt sei as inbörgert. Meist find`t man de Teiglerblaum an`n Wegrand un up `ne Bustäd`. Af un an (vör allem up ´feuchten Leihm) kann sei sick tau grote Plackens utwassen. Siet lange Tieden warden de Lowwbläder all as Heilmiddel gägen verschiedene Verküllungskrankheiten brukt. Oewer vörsichtig! In ehr sünd de giftigen Pyrrolizidinalkaloide binnen, de ok in`t Jakobs-Greiskrut sünd.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.