Maandenplant

Tau de an`n meisten vörkamende Waderplanten in de Tropen un tau`n Deil ok Suptropen tellt de weltwiet verbreit`te Wadersalat. Disse Oort vun Aronstabgewächse (Araceae) kann an de böbelste Schicht vun`t Wader vun`n stillen Diek orrer langsam dümpelndet Wader ganz dichte Bestänn´ billen. De rosettenorrig ahn Stäl anurdneten Lowbläder wiesen bet tau 15 Längsnerven up, de vör all`s up de Unnersiet hervör kieken. An de böbelste Siet sünd de Lowbläder dicht an dicht mit fiene Hoor oewertreckt, vun de de Waderdruppens afperlen un all anneren Partikel dorbi mitnähmen (Salvinia-Effekt). Dordörch können sick ok Algen, Moos un Flechten binah nich up de Bläder ansiedeln un sei ok nich beschatten.

Blot so af un an kamen vun ein gräun Hüllblatt ümgäben, lütte, eingeschlechtige Bläuten rut, de twischen de Bläder versteckt sünd. Up de Unnersiet vun de Rosetten befinnen sick in´t Wader ragende, faserige Wöddeln. De Vermehrung erfolgt vör allem ungeschlechtlich dörch Utlöperbillung. In Kultur enwickeln sick de Planten an`n besten bi Wadertemperaturen vun 20 bet 25 °C. De Wadersalat süllte jedoch nie nich äten warden, wieldat hei in alle Plantendeile ganz fiene Kristalle hett, un dei künnten tau Verletzungen führen!

In`n Botanischen Gorden schwemmt Pistia stratiotes up de Bäk un den Diek vun dat Tropengewächshus.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.