Maandenplant

Tau uns bekanntesten Allee- un Parkböm tellt de Platan. De Gattung Platanus (Platanaceae) umfött 8 Oorten, de up de Nuurdhalwkugel verbreit`t sünd. In Europa is blot de Morgenländische Platan P. orientalis (östlicher Middelmeerrum) tau Hus. De in Middeleuropa plant`te Ahuurnorrige Platan is `ne Krüzung ut P. orientalis un ut de nuurdamerikansche P. occidentalis. Wohrschienlich is sei in`t 17. Johrhunnert upkamen.

Bi binah all Oorten hannelt sick dat üm sommergräune Lowwböm, bi de sick de Bork in Platten aflöst. Ehre wesselstännigen Lowwbläder sünd ahuurnähnlich un mit stiernorriget Hoor oewertreckt. De unschienboren, eingeschlechtlichen Bläuten stahn in kugelorrigen Köppen. Mit `ner Höch` von bet tau 45 m un mit Stämm, de `nen Dörchmesser von mihr as 1,5 m kriegen können, seihen de Böm bannig statsch ut. De winterharten Böm können `n bäten Afgas af un wassen dorüm ganz gaut ok in `ne Mird von uns Städte. Platanen benödigen väl Platz un deinen vör allem up grote Plätze as Schattenspenner.

In`n Botanischen Gorden steiht `ne Ahuurnblädrige Platan an`n middleren von de 3 Dieken gliek an`n Hauptweg. In ehr hett sick ein Rundblädriger Bomwürger (Celastrus orbiculatus) bet in de Bomkron na baben wunnen.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.