Maandenplant

De Oort Ficus carica is in`n Middelmeerrum tau Hus un tellt tau de öllsten Planten, de de Minsch för sick nutzt hett. So wiesen uns archäologische Funn` von Feigen ut dat östliche Middelmeerrebeit (intbesonnere ut Jericho), dat de Ätfeig` all vör 12.000 Johr plant würd`. Bi de sihr grote Gattung Ficus hannelt sick dat bi F. carica üm ein von de wenigen Oorten, de nich ümmergräun sünd. In`n Winter schmitt de Ätfeig` ehre gelappten, ruuch behoorten Lowwbläder af. Ganz anners makt dat tau`n Bispill de bekannte Gummibom (F. elastica), de ümmergräun is.

De Echte Feig` drägt as `ne Beer utseihende Bläutenstänn`. Sei hemmen `nen Dörchmesser von bet tau 5 cm. Vör allem bestahn sei ut Bläutenstannsachsgewäw un sluten tahlrieke lütte männliche un weibliche Bläuten in. An `ne Spitz gifft dat `n smallet dörch Hochbläder verslatenet Lock (Ostioloum nömt). Bi de Bestäubung helpen de Gallwespen. In`n Sommer wassen de Feigen as`n Fruchtverband. De Echte Feig` kann in milde Rebeite von Dütschland ok buten plant warden. In`n Botanischen Gorden ward sei ok in Form von statsche Tubbens hollen. In`n Winter süllten sei an`n frostfrieen Urt stahn.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.