Maandenplant

Tau de bekanntesten up de südliche Halwkugel wassenden Nadelböm tellen de Araukarien. De Gattung Araucaria (Araucariaceae) ümfött woll an de 20 Oorten, de mihrstendeils up Neukaledonien, in Australien un Südamerika vörkamen. Bi all Oorten hannelt sick dat üm ümmergräune deilwies orrig grote Böm. Ehre Lowwbläder seihen an de jungen Böm noch as Nadeln ut, an de utwussen Böm hemmen sei sick denn schuppenorrig verbreidert un können sick ganz schön tau Wehr setten. Sei sünd as `ne Spiral an de Twieg anwussen. De meisten Araucaria-Oorten sünd tweihüsig, d. h. dat gifft männliche un weibliche Tappen. De männlichen Tappen seihen as`n Zilinner ut, oewer de weiblichen Tappen sünd mihrstendeils kugelig.

Von mihreren Oorten (ü. a. A. angustifolia) kann man de Samenkürn äten. Verschiedene Araukarien (t. B. de Chilenische Araukarie, A. araucana) warden as Park- un Zierböm nutzt, de ok in Deilen von Middeleuropa den Winter oewerstahn. Disse Oort is in`n Botanischen Gorden in`n Koniferen-Deil von dat Arboretum tau seihn. Äbenso schön süht de „Zimmertanne“ (A. heterophylla, ok Norfolk-Dann nennt na de passige Pazifikinsel), de bi uns dunnemals as Stuwenplant sihr beleiwt wier. Sei benödigt in`n Winter `nen hellen un käuhlen (5–10 Grad C) Rum.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.