Maandenplant

De Gattung Verbena (Iesenkrutgewächse, Verbenaceae) umfött je nah Fastlägung 70–200 Oorten, de vör allem in de Niege Welt vörkamen. Bi de mihrsten Oorten hannelt sick dat üm krutige Planten. Dat gifft oewer ok Strüker. Tauierst wier dat Stiewe Iesenkrut bet in de deipen Lagen von Südamerika wiet verbreit`t. Bi uns is`t all stellenwies verwildert. Oewer as hübsche Beetplant is disse Oort in uns Gordens mit verschiedene Sorten tau seihen.

Dei bet tau 100 cm hoge Staud` hett stiewe, vierkantige Stängel, de ruuch behoort sünd. Dei gägenstännig anurdneten, länglichen Lowwbläder sünd an`n Rand ungliek tähnt. Von`n Juni (Rosenmaand) bet in den Harwst hen kamen de leicht zygomorphen Bläuten, de in dichte as `ne Ähr` formte Bläutenstänn`anurdnet sünd, rut. Sei wiesen ein dunkellila bet hellvigelettet Krohnruhr mit `ner Läng` von ca. 1 cm up. Tausamen mit annern buntbläuhenden Oorten passt dat Stiewe Iesenkrut as Plantung up Farwenbeete sihr gaut. De anspruchslose oewer frostempfindliche Oort wasst giern an sonnige Rebeite un is meistendeils einjöhrig.

In`n Botanischen Gorden steiht dat Stiewe Iesenkrut in de Systematische Afdeilung dicht bi den`n Staudengorden.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.