Maandenplant

De tau de Familie von de Kieferngewächse (Pinaceae) gehürende Gattung Picea umfött 35 bet 40 ümmergräune Oorten, de blot up de Nuurdhalwkugel wassen. In wiede Deile von Middel- un Nuurdeuropa un bet na Sibirien rin is de Gemeine (Einfache) Ficht – uns leiwer Dannenbom (ok Rotdann` nömt) – `n ganz bedüdender Bom in natürlich wassten Nadelwäller. De gifft dat in Middeleuropa fast blot in de Hochlagen in`t Gebirg`. In de Nuurdalpen bild`t de Fücht twüschen 1700 un 1800 m de Bomgrenz. In`t Flachland kümmt Picea abies in Dütschland natürlich wussen blot in Deile von de Lausitz vör. Dor gifft dat nämlich all `n utprägtet Kontinentalklima (mit sihr kolle Winter).

As uns wichtigster Holtlieferant ward de Gemeine Ficht mihrstendeils in`n Forst (oft in Monokultur) anplant. Dat Holt von ollen, äbendrächtig wussenen Fichten spält in`n Musikinstrumentenbu `ne wichtige Rull.

Up`n günstiget Flach bild`t de Dannenbom bet tau 55 m hoge, grade Stämm` ut. Dei dunkelgräunen Nadelbläder warden bet tau 2,5 cm lang un lopen in `ne utprägte, `n lütt bäten stäkende Spitz ut. Männliche un weibliche Bläuten kamen meist in`n Mai (Wonnemaand) un Juni (Heumaand) rut. De brunen Zappen hängen in`t Gägendeil tau de echten Dannen von de Twieg dal un erreiken `ne Läng` von bet tau 15 cm.

In`n Botanischen Gorden stahn mihrere grote Böm in de Koniferensammlung näben dat Alpinum.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.