Maandenplant

Tau de Gattung Juniperus (Machandelbom) tellen ümmergräune Strüker un Böm, de in de gemäßigten Rebeite von de Nuurdhalwkugel wassen. De Sadebom wasst in Middel- un Südeuropa as ok in Asien. In Dütschland kümmt de Oort in de Alpen vör. Hei leiwt apene, deilwies felsige Standurte.

Bi de tau de Cupressaceae tellende Gattung gifft dat ok noch Verträder mit Schuppenbläder orrer Nadelbläder. De Sadebom is sihr verännerlich. Man kann tahlrieke Varianten ünnerscheiden. As Struk orrer ok as Bom bringt hei `ne Höch bet tau ungefihr 5 m, wurbi hei meist nedderliggend wasst. Jungformen billen Nadelbläder ut, de bet 5 mm lang warden. Öllere wiesen schuppenförmige Bläder up. Wenn man de Bläder mit de Fingers breitdrückt, rückt dat unangenehm streng (ätherische Öle). Vörsicht: alle Deile von de Plant sünd tödlich giftig! Näben de einhüsigen gifft dat ok tweihüsige Strüker orrer Böm. De blagschwatten, beerenorrigen Tappen sünd in`n Harwst riep.

In`n Botanischen Gorden find`t man den Sadebom in`t Arboretum in`n Rebeit von de Koniferensammlung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.