Maandenplant

Sneimaand 2022: De Christros (Helleborus niger)


De tau de Hahnenfautgewächse (Ranunculaceae) gehürende Gattung Helleborus ümfött so an 20 Oorten, de in alle Deile giftig sünd. Väle Helleborus-Oorten (ümmer Christros orrer Nieswurz orrer Wrangblaum nennt) kamen in`t Middelmeerrebeit vör, wurbie de Südalpen un de Barge von`n Balkan de Mird disser Oortenvälfalt billen. Dat hannelt sick üm utduernde krutige Planten, de kräftige Rhizome besitten.

De Christros orrer Wrangblaum (H. niger) is vör allem in de Alpen tau Hus. Sei drägt ümmergräune Lowwbläder, de langstälig sünd. Ehre Bläder sünd in einzelte längliche Afschnitte updeilt. Je na Wäder kamen de Bläuten von`n Dezember (Christmaand) bet April (Ostermaand) rut. De meistendeils einzeln an de ennstännigen Stängel anurdneten Bläuten sünd upfällig grot un können `nen Dörchmesser von bet tau 10 cm kriegen. Ehre sihr schöne Bläutenpracht is witt un kann `n bäten rötlich oewerlopen sien. In`n Sommer kamen ut de Fruchtbläder 2–4 cm lange Balgfrüchte rut. Dorin riepen väle Samen.

As Gordenplant is de Christros siet dat Middelöller sihr beleiwt un dat warden väle Sorten tücht`t. Sei leiwt Halwschatten un `ne kalkhollige, dörchlässige Ierd. In`n Botanischen Gorden wasst sei in de Offizinellen Afdeilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.