Maandenplant

Wienmaand 2018: De Spillbom (Euonymus alatus)


De Gattung Euonymus gehürt tau de Bomwürgergewächse (Celastraceae). So bi 130 Oorten (dorvon de meisten in China) gehüren tau disse Gattung, de Strüker un lütte Böm mit inschlött. In Middeleuropa is dat Gewöhnliche Pfaffenhütchen (E. europaeus, giftig!) wiet verbreit`t.

Bi E. alatus (äbenso giftig!) hannelt sick dat üm `ne Oort, de dörch upfallende Korkleisten an de Twieg kennteikent is. Tau Hus is de sommergräune Struk in China un Japan. De gägenstännig anurdneten Lowwbläder nähmen in`n Harwst `ne lüchtend rode Farw an. In`n Mai (Wonnemaand) un Juni (Heumaand) kamen unschienbore, gräunliche Zwitterbläuten rut. In de Kapselfrüchte liggen de Samen, de von `nen orange farwten Arillus (Samenmantel) ümgäben sünd. An `nen halwschattigen Urt is dat Pfaffenhütchen orrer dat Schausterpriekenholt gaut tau hollen. In uns Breiten is de Spillbom vullstännig winterhart. In`n Botanischen Gorden wasst hei in`t Arboretum längs von`n Weg tau dat Japanhus.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.