Maandenplant

Christmaand 2022: De Hinoki-Schienzypress (Chamaecyparis obtusa)


Verschiedene Oorten von de Gattung Primula (Primulaceae) tellen in uns Rebeite tau de klassischen Frühjohrsankünniger. De Gattung Primula umfött mihr as 400 Oorten, de all tauhop in de Nuurdhalwkugel up uns Ierd wiet verbreit`t sünd. De meisten Primel-Oorten kamen in`n Himalaya un in de chinesischen Barge vör. Meistendeils hannelt sick dat üm utduernde Krüter, de `ne grundstännige Bladdrosett´ besitten.

Von`t östliche Asien dörch ganz Zentral- un Vödderasien bet na Middeleuropa hen kümmt dat Echte Himmelssloetelchen orrer de Echte Sloetelblaum oft vör. Dat wasst vör allem up sünnige Wischen un in`t lichte, ihrer dröget Gebüsch. De Bläuten von de sihr verschieden formten Oorten kamen von`n Saatmaand (April) bet Wonnemaand (Mai) rut. Sei stahn in`ne bet tau 30 cm hogen ruuch behoorte Dold`. De röhrenförmigen, gaut rükenden Bläuten wiesen `ne güldengäle Kron up. Sei hett up`n Grunn` up jedein Bläutenbladd `nen orange farwten Placken. Ut den`n Fruchtknuppen wasst `ne Kapselfrucht mit väl Samen in.

In Parks un Gordens ward dat Echte Himmelssloetelchen all von`t Middelöller an anplant. Tau`n Ansiedeln reikt all, von`n frühen Harwst an bet in`n Winter den Samen an Urt un Stell uttaustreuen.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.