Maandenplant

Väle Orchideen teiken sick dörch wunnerhübsche statsche Bläuten ut. Dat gellt ok för de Sumporchidee. Disse in`n Ierdbodden wassende Oort is von ehren Bu her sihr verännerlich. Sei is in Südostasien wiet verbreit`t un gifft dat ok up de pazifischen Inseln.

Ehre Bläutenstänn` können binah 1 m hoch warden un ofteis kamen doran mihr as 20 Einzelbläuten rut, de `nen Dörchmesser von ungefihr 10 cm erreiken. De buten un binnen liggenden Bläutenhüllbläder sünd länglich-lanzettlich un babenup licht brun farwt. Upfällig is de röhrenförmige Lipp`, de rodvigelett un gäl tönt is. Sei kann bet tau 5 cm lang warden. De Bläuten wiesen `nen korten gälen Sporn up. De Sprossen besitten an ehren Grunn` eiförmige Verdickungen, so nennte „Pseudobulben“. Disse drägen mihrere, bet tau 50 cm lange Lowwbläder. Phaius tankervilleae brukt väl Ierdfeuchtigkeit un leiwt `nen schattigen Urt.

In`t Tropenhus von de Loki-Schmidt-Gewächshüser is P. tankervilleae in de Wintermaande in Vullbläut tau seih`n.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.