Maandenplant

Lenzmaand 2021: De Hasenkleewer (Oxalis acetosella)


De väle Oorten (oewer 500) ümfatene Gattung Oxalis is binah up de ganze Welt verbreit`t un gifft ehren Namen för de Familie von de Suerkleewergewächse (Oxalidaceae). Bi de meisten Verträder hannelt sick dat üm siede (niedrige) Krüter, de einjöhrig orrer utduernd sünd.

De Hasenkleewer orrer Kuckuckskleewer besitt, dormit hei oewerläben kann, `n getähntet, ünnerierdischet Rhizom. So von`n Lenzmaand bet tau`n Wonnemaand kamen de Lowwbläder un Bläuten rut. De Lowwbläder sünd dreitellig un kleewerorrig feddert (Verwesselung möglich!). Sei schmecken ganz schön suer, wat up dat Vörkamen von Kaliumoxalat un Oxalsäure trüchtauführen is. So schützt sick de Plant vör`t Affräten. De fieftelligen Bläuten (Dörchmesser 1–2 cm) drägen witte Kronbläder, de `ne vigelette Aderung upwiesen. Ut de Kapselfrüchte warden de Samen mit Druck rutschaten.

De Hasenkleewer wasst in`t gemäßigte Europa un Asien in`n Unnerwuchs in`t Holt sihr giern up suere Ierd. Dat hannelt sick üm `ne Oort, de den Schatten giern mach un de einfach up `n bäten feuchte Ierd un humose Stellen in Gordens un Parks wasst.

In`n Botanischen Gorden dröppt man Hasenkleewer in`t Arboretum ünner de Fichten an.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.