Maandenplant

De Gattung Viburnum in de Familie von de Moschuskrutgewächse (Adoxaceae) umfött oewer 200 Oorten, de vör allem in Ostasien un Nuurdamerika vörkamen. In Middeleuropa sünd blot twei Oorten tau Hus. Dat sünd de Gewöhnliche un de Wullige Sneiball.

De Duftende Sneiball (V. farreri synonym V. fragrans) stammt eigentlich ut dat nuurdliche China. De Oort wasst strukorrig un kriegt `ne Höcht von ungefiehr 3 m. De dichtstahenden, rotbrunen Twieg drägen spitz-eiförmige Bläder, de in`n Harwst `ne schicke rötliche Farw annähmen. Bläuhtiet is in`n Näbelmaand un Christmaand un ok noch in`t Vörjohr (Lenzmaand/Saatmaand). De Bläuten stah`n in dichte 3–5 cm lange Rispen. Sei besitten `ne röhrenförmige Kron`, de so woll 1 cm breit is. De Bläutenfarw reikt von witt bet tau rosa. Upfallen deit de starke schöne Geruch von de Bläuten.

As Schmuckholt benödigt de Duftende Sneiball einen hellen sünnigen Platz üm vull tau Geltung tau kamen. Hei hett einen geringen Anspruch an de Ierd. Sei süllte allerdings nich tau dröch sien. In`n Botanischen Gorden stahn twei grote Strüker in`n Japangorden un bi den`n middleren Diek.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.