Maandenplant

Tau de an`n meisten uptreckten Schmuckplanten in de tropischen Klimagägenden tellt dat Wannelröschen. Dat gehürt tau de Gattung Lantana (Iesenkrutgewächse, Verbenaceae), de oewer 100 Oorten umfött. Bi L. camara hannelt sick dat üm `ne Oort, de von`n Süden von de USA bet wiet na Südamerika verbreit`t is.

Bi dat Wannelröschen hannelt sick dat üm einen giftigen Struk, de bet tau 2 m hoch warden kann. De Nam` Wannelröschen wiest up de Wannlung von de Bläutenfarw hen, de je na Sort` tauierst orangefarwt is un later tau gäl un rod wesselt. De lütten Bläuten stahn in dichten Köppings tausamen. Ut de Bläuten ward denn ein beerenorriget Steinawt, dat besonners giern von de Vagels fräten un utbreit`t ward. De bestachelten Twieg drägen gägenstännig anurdnete Lowwbläder, de dull rüken.

Besonners up de ozeanischen Inseln (ü. a. Galapagos Inseln) is dat Wannelröschen tau `ne Maless worden, wieldat de Oort riesige Bestänn` billt`t un de ursprünglichen Planten utstäkt. In`n Botanischen Gorden steiht `ne Tubbenplant den Sommer oewer in `ne Mird von `t Rondell in de Offizinellen Afdeilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.